Baraza la Madiwani Limepitisha Rasimu na Mpango wa Bajeti kwa Mwaka wa Fedha 2018/2019

Posted on: January 29th, 2018

Afisa Mipango na Takwimu kwa niaba ya Mkurugenzi  Mtendaji  (W) amewasilisha mapitio ya Bajeti  ya Mwaka 2016/2017, 2017/2018 na Rasimu  Mpango wa bajeti ya mwaka 2018/2019 mbele ya wajumbe wa Baraza la Madiwani la Halmashauri. Ameeleza kwamba, katika kuandaa bajeti ya mwaka 2018/2019, Halmashauri imejikita katika miradi inayolenga kuleta matokeo chanya na yenye kugusa maisha ya wananchi moja kwa moja, kukamilisha viporo na madeni ya wazabuni kabla ya kuanzisha miradi mipya, na miradi inayolenga kuzingatia malengo endelevu 17 ya mwaka 2030 (SDGs).

Kwa kifupi ameeleza vipaumbele vya bajeti ya Halmashauri kuwa ni kama ifuatavyo;-

• Kuanzisha miradi ya kimkakati kwa ajili ya kuongeza mapato ya Halmashauri kwa ujenzi wa maegesho ya magari makubwa , stendi ya Hiace Kisesa, ujenzi wa vibanda katika masoko, ukarabati wa kituo cha utalii Kageye na skimu za umwagiliaji.
• Ukamilishaji wa vyumba vya madarasa na nyumba za walimu katika shule za Msingi na Sekondari.
• Ujenzi wa jengo la wagonjwa wa nje (OPD) katika Hospitali ya Wilaya.
• Uanzishwaji wa shule ya kidato cha 5 na 6.
• Uanzishwaji wa chuo cha ufundi stadi Ilungu.
• Ujenzi wa shule ya Bweni ya Wasichana.
• Ukamilishaji wa miradi ya Maji na uchimbaji wa Visima.
• Ukamilishaji wa zahanati na Vituo vya Afya
• Kupunguza uhaba wa watumishi kwa kuajiri watumishi wapya 1404.

Wajumbe wa Baraza la Madiwani wakiongozwa na Mwenyekiti wa Halmashauri Mheshimiwa Hilali Nassoro Elisha ambaye pia ni Diwani wa Kata ya Nyanguge, wamepongeza menejimenti kwa ushirikiano ulioonyeshwa katika kuandaa vikao vya bajeti kuanzia CMT, baraza la wafanyakazi, DCC, Kamati za kudumu za Halmashauri, hadi Baraza la Madiwani, pia wamepongeza mpango wa Bajeti  kwani umezingatia masuala mtambuka kama vile ushirikishwaji wa Wananchi na wadau wa masuala ya jinsia , mazingira, vijana, UKIMWI, na kuzuia Rushwa.

Aidha baada ya pongezi hizo, wajumbe kwa kauli moja wamepitisha rasimu ya Mpango wa bajeti ya mwaka 2018/2019 ambapo Halmashauri ya Wilaya ya Magu imeomba kuidhinishiwa Jumla ya Tshs.45,057,115,000.00 kutoka vyanzo vyake mbalimbali na kutoka ruzuku ya serikali kuu.