Idara ya Mifugo inaundwa na vitengo viwili (2). Kitengo cha Mifugo na kitengo cha Uvuvi. Jumla ya watumishi wa idara ni 55 ambapo kitengo cha Mifugo kina watumishi 43 na kitengo cha Uvuvi kina watumishi 12.
Kwa mujibu wa Sensa ya Watu na Makazi ya mwaka 2012, Wilaya ya Magu ina jumla ya ng’ombe 204,250 wa asili, ng’ombe 259 wa kisasa, punda 318, mbuzi 61,007 kondoo 38,645, nguruwe 1,603, mbwa 6560, paka 2460, kuku wa asili 385,557 na kuku wa mayai 18,397.
Kwa mujibu wa Sensa ya Wavuvi ya mwaka 2016, wilaya ya Magu ina jumla ya wavuvi 2708 wenye kumiliki mitumbwi 581 na nyavu 13088. Pia wilaya ina wafugaji wa samaki 110 wenye jumla ya mabwawa 135.
MALENGO YA IDARA
Lengo kubwa ni kuhakikisha wafugaji wanapata Elimu ya ufugaji bora wa kisasa na wenye tija kwa nia ya kumfanya mfugaji aongeze kipato ili aondokane na umaskini uliokithiri lakini pia kuongeza pato la Taifa.
VITENGO VYA IDARA NA MAJUKUMU YAKE
KITENGO CHA MIFUGO
kutoa elimu, ushauri, huduma za kinga/tiba na uzalishaji wa malisho bora ya mifugo
Kufanya tafiti za magonjwa ya mifugo kwa kushirikiana na taasisi mbalimbali kama vile Kituo cha uchunguzi wa Magonjwa ya Mifugo kanda ya Ziwa (ZVIC) Mwanza
Kuhakikisha usalama wa nyama kwa matumizi ya binadamu
Kujenga miundombinu rafiki kwa wafugaji kama vile Majosho,Machinjio,na Malambo
Kudhibiti mifugo inayoingia na kutoka ili kuepuka magonjwa ya milipuko na migogoro kati ya wakulima na wafugaji
Kuunda vikundi vya wafugaji ili kuwafikishia huduma za ugani wa shughuli za mifugo kwa urahisi
Kusimamia miongozo mbalimbali na sera katika sekta ya Mifugo
Kusimamia matumizi ya raslimali za kitengo cha mifugo
Kuandaa taarifa ya utekelezaji wa shughuli za Mifugo za kila mwezi, robo mwaka na mwaka na kuziwasilisha kwenye mamlaka zinazohusika
Kufanya usajili na utambuzi wa mifugo na wafugaji ili kubaini idadi kamili ya mifugo na wafugaji katika wilaya
Kuanzisha minada mipya kwa kufuata miongozo, taratibu na sheria zilizopo ili Halmashauri iweze kuongeza mapato ya ndani na wafugaji kuvuna mifugo yao kwa urahisi
KITENGO CHA UVUVI
Kusimamia, kudhibiti na kuendeleza tasnia ya uvuvi kwa jamii ya wavuvi
Kuratibu maendeleo ya siku kwa siku ya teknolojia ya uvuvi ili kuwa na uvuvi endelevu
Kusimamia raslimali za uvuvi
Kutoa Elimu ya ufugaji bora wa samaki
Kubuni njia ya kuinua sekta ya uvuvi ili kuchangia pato la wilaya na pato la taifa (GDP) kwa kusanifu miundimbinu muhimu ya uzalishaji, usafirishaji na uhifadhi wa mazao ya uvuvi ili kuvutia soko la uwekezaji.
Kutatua mizozo itokanayo na maslahi ya makundi mbalimbali katika matumizi ya rasilimali ya ziwa kwa kutumia misingi ya utawala bora na utii wa sharia bila shuruti
